Баҳриддинов Хуршед
Пь ук хон туй вьдẙк, ук мẙлẙк уак ошпаз вьдẙк. Пь ук табақ ош гоху-т даю
Хьршед-бо за, мьш хон ус-ьт, табақи тез ижьм. Ам ғажу: хуб. Ма табақ-и ижьму хи
хонбо-т ма ӣ оши хи зодбуд-гẙл хару ма табақи ижьму уа ошпаз-бо даю. Ауӣ фьрасу,
ошьт хон-бо удо? Хьршед ғажу: он удьм. Ам мẙлẙк ма и-бо хела баракат даю-ьт,
ба’ди туй хон-бо шẙ, хи узньл-бо ғажу: фрӣ ошьв холо? Уа ӣ узньл ғажу, ть мьчьв
манша кьни-о, туй ть шẙй-ьт мьх ць кьнҷо ош харон. Ам мẙлẙк айрон шẙ, хи
узньл-бо ғажу, аз-ьм кь Хьршед дẙст тьмьх-бо ук табақ ош-ьм астуд, ауӣ мак ньст
вьд? Уа ӣ узньл ғажу: мь-хон на Хьршед вендẙк-ьт, на уа ти табақи ош. Ма мẙлẙк
қаар хазу, дьв шẙ туйхона-бо. Хьршед-бо ғажу: аз-ьм ть-бо ук табақ ош дуд за, ть
хон-бо ус, тьт чиз-бо на-удук. Хьршед ғажу: тьт мьн-бо ғажд за, ус хон-бо, аз-ьм
уд хон-бо хи зодбуд-гẙл-ьм хẙл. Ам мẙлẙк ғажу: аз-ьм ғажд за, мьш хон-бо ус, тьт
уд хи хон-бо. Хьршед ғажу: ти хон-ьт мь хон чиз фарқ, хакьт ғажд за, табақи тез
холӣ кьн ижьм, аз-ьм уа табақи холӣ кẙл, оғад-ьм. Ма мẙлẙк қаар фай хазу-т,
дигар хи илоҷо на-авиру-т, тар уа чьдано-рьх шẙ, касу за, арва он холӣ,
рьндьк-мьс пь уан нафьриндук. Ғажу: ай Хьршед, боб-ьт мак-и кẙл, фар со мак-и
ич-кẙй агзӣ фанд на-дудук, мь ньвьсьн-ьт нер жъẙндẙк лакẙл. Ночор, холӣ-холӣ ису
хон-бо. Ауқоти ногьзар
22.07.2011
Тьт кẙй
Ук мẙлẙк уа ӣ цомо-с кам уендẙк. Ба’д ар кẙй за, уену, фьрасу, тьт кẙй. Ук руз
пь қьшлоқ туй вьдẙк, ам мẙлẙк туй шẙ, пь хон атию салом даю, ар-кẙи ар-кẙи
фьрасу: тьт кẙй, ауондон хи ним-и ғажон-ьт, ниду. Ҷьк ғажон за, ам мẙлẙк
мардьм-и фарқ накьну, чиз-бо тар туй ису. Пь ма уахт Ошур ним мẙлẙк ць вар атию
салом даю. Ака мẙлẙк ць хи ҷо хазу, ғажу: Ошурҷон, тьт кẙй? Мардьм ҷьк айрон
фьрисон, ғажон: ад-ьс уендẙк, одати кẙлẙк за, ғажу тьт кẙй. Ба’д ць ман, дигар
хи одат-и пьртоу-ьт, хап-дак ць мардьм уло шьхсу тацу.
22.07.2011.